Čudo na "Poljudu": Hajduk izbacio ostrvskog velikana

Juniori Hajduka napravili su senzaciju i pobjedom 2:1 na "Poljudu" izbacili Mančester siti u osmini finala Lige šampiona.

Golove za splitsku ekipu postigli su Roko Brajković i Mate Antunović, a za Građane je pogodio Oskar Bob.

Bili će u četvrtfinalu kontinentalne elite u gostima igrati protiv boljeg iz duela Borusije Dortmund i Pari Sen Žermena.

Hajduk se od prve minute dobro postavio na terenu protiv favoriziranih gostiju te već u šestoj minuti zaprijetio preko Jere Vrcića. Ostrvski velikan je u uvodu utakmice imao posjed, no s vremenom mu je domaćin i u tom segmentu igre počeo parirati, piše Index.hr.

Odlična igra četa Marijana Budimira dovela je i do gola u 24. minutu. Nespretno je reagovao golman Džordž Marej-Džons, koji je izašao na 20-ak metara i pokupio dugo dodavanje ispred Antunovića.

No, loptu je samo odbio loptu do Brajkovića koji ju je preciznim udarcem smjestio u upražnjenu mrežu.

Svega devet minuta kasnije Hajduk je povisio na 2:0. Noa Skoko lijepim je dodavanjem vanjskim dijelom kopačke pronašao Antunovića, a on je predriblao čuvara i udarcem u bliži ugao pogodio metu.

Bob je u finišu prvog dijela smanjio na 1:2, a kako su mreže mirovale u nastavku, autsajder je prošao među osam najboljih.

"Osjećaj je fenomenalan, ovo je ogroman uspjeh za klub. U osam smo najboljih u Evropi, makar u juniorskoj konkurenciji. Trebaće nam neko vrijeme da shvatimo što smo napravili. Jako puno smo analizirali Siti, u tome je tajna naše pobjede. Znali smo da je teško se s njima nadigravati i da će imati posjed", rekao je oduševljeni trener Budimir.