Prva Dacia Duster nastala još 1980-ih

Dacia Duster postoji od 1980-ih, kad je prvi rumunski terenac dobio manjeg brata i na nekim tržištima se nudio upravo pod danas popularnim imenom.

Dacia Duster kao jedan od najpopularnijih i nesumnjivo najpristupačniji kompaktni SUV žari i pali tržištem od 2010. godine. Nakon redizajna upravo smo svjedoci dolasku nove generacije modela, koja i dalje ima brojne adute i velike šanse za tržišni uspjeh, navodi Index.hr.

Međutim, originalno ime ima daleko dužu istoriju. Tamo negdje početkom 1980-ih nakon što je rumunski Aro već nudio terensko vozilo bazirano na Renaultovoj tehnologiji stvorila se ideja o skraćenoj verziji.

Polovinom 1980-ih na scenu dolazi Aro 10 s 4×4 pogonom, nejakim motorom i tehnologijom starog Renaulta 12, odnosno licencne Dacije 1300.

Uz Ladu Nivu to je bio jedan od najjeftinijih terenaca na tržištu, a pažnju je posebno plijenio avanturističkom Spartana verzijom s mekim krovom. Aro kao prvi rumunski proizvođač automobila svoj tada najatraktivniji model je ponudio evropskom tržištu.

Godine 1985. model je stigao i na britansko tržište pod imenom Dacia Duster. Naime, Britancima je Aro bio totalno stran, ali ne i Dacia koja se već bila komercijalizovala s modelom Demen, licencnim Renaultom 12, piše Motor1, prenosi Autoblog.rs.

Uprkos gotovo dvostruko nižoj cijeni od Land Rovera, prvi Duster se nije proslavio. 1993. godine je povučen s Ostrva, dok je na nekim tržištima istoka Evrope bio dostupan pod imenom Aro 10.

Model se u novom milenijumu nudio u nekoliko karoserijskih verziji, sklapan je i u Italiji, a s vremenom je dobio snažnije motore uključujući i dizelaše.

Marka Aro je u međuvremenu neslavno propala u raljama privatizacije, a ime Duster Dacia je oživjela desetak godina kasnije lansiravši svoj danas globalno uspješan model.