Vunderkind iz Ukrajine: Samunenkov korača stopama Karjakina i Ponomarjova

Svijet je dobio još jednog veoma mladog velemajstora, a to je 14-ogodišnji ukrajinski vunderkind Ihor Samunenkov.

Titula mu je potvrđena ovog mjeseca od strane Svjetske šahovske federacije (FIDE) nakon što je ispunio sve uslove 26. septembra prošle godine.

Kao novi velemajstor, Samunenkov, koji je postao šampion Ukrajine sa svega 12 godina, preuzima status trenutno najmlađeg na šahovskoj sceni od američkog velemajstora Abhimanju Mišre, koji će u februaru napuniti 15 godina.

Osvojivši najvišu titulu sa 14 godina 3 mjeseca i 15 dana, Ihor Samunenkov je postao 22. najmlađi velemajstor svih vremena.

Mišra još uvijek drži rekord za najmlađeg velemajstora u istoriji drevne igre. On je imao 12 godina 4 mjeseca i 25 dana kada je napravio taj podvig u junu 2021. godine.

Samunenkov, porijeklom iz Kijeva, postao je majstor 2021, a internacionalni majstor godinu dana kasnije.

FIDE za dodjelu titule zahtijeva tri norme i rejting iznad 2.500 poena. Samunenkov je ostvario svoju prvu normu na Evropskom pojedinačnom prvenstvu u Sloveniji 2022. godine. Drugu je ostvario na Vezerkepzo ljetnom turniru u Budimpešti, Mađarska, u julu prošle godine.

Svoju posljednju normu ispunio je na Poljskom timskom prvenstvu u Lublinu krajem septembra, gde je savladao četiri velemajstora. Rejting uslov je ispunio u aprilu 2023. godine, piše Šah-mat lista.

Na top listi 40 najmlađih velemajstora nalazi se čak šest Ukrajinaca! Na vječnoj listi na drugom mjestu se nalazi Sergej Karjakin, koji sada nastupa pod ruskom zastavom, koji je imao samo 12 godina i 7 mjeseci kada je uz svoje ime dodao najvišu titulu. Ispred Samunenkova su još Ruslan Ponomarjov na 16. mjestu (14 godina i 17 dana) i Ilja Nižnik na 21. mjestu (14 godina 3 mjeseca i 2 dana).